【車小志不小】Suzuki Jimny LJ20V奠定小型「萬能車」基準

Photos: gazoo.com鈴木（Suzuki）第四代Jimny嘅原型車（prototype）喺歐洲現身多時，相信已處於最後測試階段，距離正式發表日子不遠。 Jimny係鈴木車廠嘅皇牌車系，雖然「Suzuki」廠細，而Jimny亦係「車仔」，但憑住輕巧、靈活、耗油量低、陣式底盤同強勁四驅行駛表現，喺接近半世紀以來，於國際汽車巿場叫好又叫座。

日本豐田汽車生活網站gazoo.com，最近介紹一部1973年第一代第二期Jimny，代號LJ20V。LJ原來解作小型吉普車（Little Jeep）。第一代Jimny喺1970年發表，相信好多人都以為Jimny喺鈴木車廠原創，其實首代Jimny嘅機械設計，以至整個概念都係來自一間已消失嘅日本車廠，希望（Hope）車廠，1967年，希望車廠發表佢哋最後一款嘅型號，稱為Hope Star ON型，呢款車定位小型「不整地用萬能車」，可理解為「針對不平坦路況嘅多用途車」，配來自三菱嘅359c.c.雙汽缸二衝程氣冷引擎，慳油，易養。但係ON型定價貴，銷情慘淡，聞說只賣出約20部，希望車廠亦因此告別汽車生產業務，從此轉攻製造遊樂場機動設施。

鈴木車廠老闆鈴木修覺得ON型嘅設計大有可為，決定向希望車廠購入相關設計，經過約兩年嘅改良，推出鈴木首部小型吉普車。 LJ20V車長不足三米，只有2990mm、闊1290mm、高1680mm，採用陣式（又稱貨車底盤/梯型底盤），配搭編號L50型嘅359c.c.水冷直列雙汽缸二衝程引擎，最大馬力28匹。Jimny馬力雖小，但因車身輕巧，只有670kg，能夠輕易爬上35度車坡。喺Jimny誕生前，引擎至少要達2000c.c.先夠扭力做到呢類高難度動作。LJ20V極速75km/h。

LJ20V可坐三人，前二後一，但後排單座只屬輔助及僅供短途乘坐性質。呢部1973年嘅第二期型，轉用水冷引擎，可靠得多。據現任車主講，上任車主係一位資深嘅Jimny玩家，因年紀老邁而出讓，上任車主保養功夫算幾好，車廂同引擎艙內多組原裝告示標貼仍被好好保留，車廂、座椅、中控台，以至原裝收音機仲喺度，現任車主接手後，只需局部為車身重新上漆，狀態已十分好，連專門維修老爺Jimny嘅車房技師都大讚。