買樓鋤價8道殺手鐧


 
上車價屢穿心理關口!業主恐懼買家貪婪,你鋤我又鋤,何解你執到筍貨,我得個恨字?皆因傾價講章法,「三無」買家(無牙力、無用腦、貪得無厭)註定做loser,今期請嚟身經百戰嘅「A準」MiMi現身說法,贈你買樓鋤價8招,祝君早日同業主傾掂數。
 
1. 借刀殺價 廣收「A準」兵


個巿靜個鬼,「A準」化餓單為力量,為求成「刁」,同業主砌價理應更積極,溝多幾位猛將幫手,道理似娘娘收兵,各派用場﹗要提振軍心?重賞之下有勇夫,同一個盤,隔嚟諗計慳佣,你霸氣講明「一隻佣」有多冇少(大前提係計啱條數),「A準」s call業主試價寧舍有心有力,還價都還多幾口。
 




2.潛龍勿用 底線你估我唔到


真情流露係鋤價宿敵。遇啱心水盤即喜形於色,等如自暴其短,自封後路,未傾價已處下風,咪以為踩低個盤好醒,西斜低層殘裝彈到盡,呃嬲輸風度。精明做法係潛藏諗法要求,為鋤價留進退空間,黃德斌表情加「嗯嗯嗯係係ok再睇睇」式對白,宜引對方先開腔表態,再因勢利導出擊。
 


3.樹大招風 老江湖宜低調


業主最忌同老江湖交手,無他嘅,怕蝕章俾你。要鋤價先要令對方釋戒心,投資者入巿忌鋪張招搖,換業主角度睇,個客買樓自住求好價順理成章,投資收租錢搵錢?你賺不如我賺,一蚊都唔平俾你﹗
 




4.苦肉計 呃Like有技巧


鋤強扶弱係人性,唔少準買家以私人理由博業主高抬貴手—外母逼買樓,買磚頭報父…要幾煽情有幾煽情,唔敢話唔work,同情分可能壓到一萬幾千,但溫情牌唔可以亂打,尤其自爆父母送首期係大忌,理由好簡單,上車需父幹VS買樓靠苦幹,業主要益會益邊個?
 


5.巧借東風 順水進舟


鋤價輸人唔輸陣,想鋤爆業主而令佢心服口服,大智慧不如趁勢,以目前巿況,樓價+供應係兩大屈機指數—樓價由高位跌咗一成,今年兩萬幾伙新盤排緊隊,元朗、將軍澳重貨,屯門大埔麵粉價低開、嘉湖劈到3球,你唔減出面大把貨揀…拋書包拋到如此出神入化,唔食住業主都難啦。




 




6.順手牽羊 就勢取利


鋤價成功率取決天時地利人和,向「A準」套足料捉路增勝算。若然業主近年高位入貨,想減多俾你都難。撞正03、08年低位入巿、連租約盤、手揸重貨、準備移民、投資失利急周轉甩貨…遇到呢類業主要偷笑,對方沽壓大,傾價事半功倍,配合重手啲落訂、縮短成交期兩大加分動作,賣方套現快人一步,抵減俾你啦。
 
7.速戰速決 以退為進


唔少買家以「拖字訣」吊高嚟賣,須知討價還價怕夜長夢多,拖泥帶水多變卦,等如消耗己方談判籌碼。還價乾脆,底線明確之餘,仲要識表態,「A準」又好、業主又好,set個限期佢最後覆價,係破釜沉舟一著:「下星期減唔到價,我放棄啦。」表明水位以外冇讓步餘地,杜絕對方得寸進尺!
 
8.先敬本票後敬人

臨門一腳,錢銀交易不外乎誠意,十個有九個業主都抱同一個宗旨:「減價?有票先講啦」用行動話佢知你係實客唔係運桔,落大訂一般喺律師樓開本票,若然你簽臨約時落細訂已經本票在手,成「刁」賣方即簽即袋,在情在理都收順啲,變卦機會都低啲。











© m.foodpara.com 2024   |   Privacy Policy